لسه قلبي لم يتعب من المشاوير

انا بقالي مدة محترمة بحاول الاقي نت علشان اعرف الاقي المدونة
انا جيت هنا بعد غياب كتير علشان اقول اني لسه زعلانة من النهايات الغير مطلقة
لسه بعيط على الرسايل اللي مابتوصلش ولسه بزعل على الناس اللي بتفضل تختفي عن انها تدينا نهايات حتى تريحنا
كل موقف بيزيد رغبتي في اني اروح عند ربنا علشان اشوف حقيقة الاشياء
انا تعبت من كوني غريبة وبتدور تعيش وسط ناس بيفضلوا كل حاجة عن انهم يفضلوا جنبي
يارب ونس يارب حرمتني من امي وانا لسه مالحقتهاش
وحرمتني من بيتي وحياتي وانا مش زعلانه وراضيه
بس الونس يارب الونس بس
انا معنديش رفاهية التعب ده علشان انا في رقبتي روح
سايق عليك حبيبك النبي ماتخليني في الدوامة ديه اكتر من كده
 

شـويـة تفـاصيـل

انا بقالي حوالي 212 يوم في السرير مابنزلش ولا بتحرك الا بالاسعاف او بمساعد تسعه رجاله
النهارده اول يوم انزل لوحدي تقريبا السلم علي رجل ورجل 
يااااااااااااااااااه علي الاحساس ياجماعة
المهم ايه بقي سبب النزول وهو ده المهم
انا كنت حاسه اني بدفن من جوه ، شويه ضعف علي شويه خذلان خلوني احس اني كم لا نفع منه ولا له 
الي جنب اني "كان" نفسي اوصل رساله لشخص ما بنفسي بلحمي ودمي برجلي المكسورة ونفسي المتعبة
بس ربنا رحيم ورؤف بنفسي وبقلبي فوق الوصف
نص المشوار اتوفقت فيه جدا والنص التاني اتوفقت فيه برده بس بترتيب ربنا اللي انا راضيه بيه وموافقه علي تبعاته .
خرجت بعد المشوار التاني ده تقريبا منهارة بس ربنا يريد بترتيبه اشوف "بيت اسماء" حبقي اكيد افردله تدوينة مخصوص لانه يستاهل حقيقي وربنا يعوضك بدل الكلمة الحلوة كلام وبدل الطبطبه الواحده بطبطبات من ناس مفيش ادني شك في حبهم ليك .
اليوم النهارده مكنش حيكمل بالشكل ده الا بتوفيق ربنا
ووجود نهال البلاط ورؤي وعم جمال الله يكرمه اللي دايما موجود في اوقات الحاجة
اهم حاجة خرجت بيها من اليوم ده
تحقيق الآية "والكاظمين الغيظ والعافين عن الناس والله يحب المحسنين"
وتاني حاجه اني غالية قوي والله واني بس سحلت نفسي شوية بس الواحد حيفوق وحيقوم
شكرا للوجع قبل الراحه شكرا للكلمة الوحشة قبل الحلوة شكرا لصبر الناس عليه شكرا شكرا شكرا
كان معكم من سرير التعب/التجربة 
سلمي جاد

خلاصة تجربة

                                              "ماتزعلش"

*اصلك لو زعلت من سبب حقيقي يبقي اتعلمت منه يبقي المفروض تفرح.

*ولو زعلت من كلام حد مهم عندك ...  يبقي انت غلطان لانه اكيد يااما بيبصرك بعيب او غلطه او الكلام ده بيفتح مجال جديد ودايرة جديده في علاقتكوا ببعض.

*ولو زعلت من موقف خلص عندك ... تبقي بتستهبل ماهو خلص اهو بتنكد علي نفسك ليه ؟؟؟!!!

*ولو زعلت من حاجه خايف انها تحصل .. يالهوي انت كمان حتخترع اسباب تزعلك لسه ماحصلتش.

                                   في النهاية 

حرفيا مفيش حاجة تستاهل انك "تزعل" منها او عليها .

فــضـفــضـة

مكنتش عمري بحب موضوع الحكي ده عندي معاه مشكلة
محدش كان دايما بيستاهل والاهم كانت طول عمري مشاكلي غير باقي اللي في سني فكانوا بيصعبوا عليه اني احكيلهم او اشغلهم بيه
يعني  علي شويه تعقيدات بسيطه متأصلة في الجذور اللي هو نظام ماينفعش تحكي وماينفعش تشتكي وقائمة من اللي ماينفعش 

عدي الوقت وخلصت المشاكل او بمعني اصح اثرها بس هو اللي فضل وواضح انه حيفضل فاضل ليوم الدين
المهم اني هنا عايزة اعترف
اني حضطر ارجع للمربع صفر تاني مع نفسي
انا اسفه يادينا انتي عملتي اللي عليكي بس للاسف انا مااانفعش في الدور اللي حطتيني فيه 

بفتكر مسلسل سارة اما رجعت تاني للوضع الجنيني وقالت لحسن
"انت السبب" 

اعـترافـات

انا اكتر كائن حي قابلته بيتصدم في الناس
انا اكتر كائن حي قابلته بيسامح الناس
انا اكتر كائن حي قابلته بيتفنن في القاء كل اللوم علي نفسه
انا اكتر كائن حي قابلته ومش عارفه اتعامل معاه
 بس كده 

ماما حبيبتي

صباح الفل يامشمش
هو يعني علشان ماقولتش علي رمضانا سوا تفتكري اني ناسيه؟
ياماما شادية انا اوقات بحس اني عندي معاكي مواقف وذكريات تكفيني عمرين فوق عمري
عارفه ياماما والله "الموت مااخد منك الا الطرحة والعباية السودا"
رمضان السنه ديه كالعاده اصلا ماجاش
بنعمل المظاهر بتاعته كلها تقريبا يعني لكن علي رأي عمر همام زميلي رمضان بيجي لحظه في القلب كده استغليها فكك من فكرة انه شهر وايام وساعات
هو معاه حق ياماما
طيب ... انا اعترفتلك بكل الغلطات كالعاده ولا لسه في حاجه اما حنتقابل فوق حتقوليلي برده معرفتهاش منك ياسلمي ؟
انا بتكلم معاكي كتير قوي ياماما
ماما قعدة السرير طولت والمشكله اني مش عارفه امتي حقوم يعني ايه اللي حيحصل وبعديها حقوم بقي زي الأول
ياست الناس مااانتي عارفه الوضع والحال القديم والجديد لا هو زعل ولا هو سخط هو بس في "رقية" وتقريبا كده محتجالي :)
بيقولولي اني بقيت شبهك .. تفتكري ؟
طيب بتقضي رمضان فوق ازاي
انا عارفه انك حتحبي تقضيه مع كل حبايبك اللي اكييد عاملين الابندا فوق :D
مفيش فوق غدر ياماما صح ؟
حتي لو في غدر وحتبقي موجوده اعتقد حيبقي مش غدر
وحشتيني والسلام ختام
بنتك الصغيرة سلمي
29/6/2014

كل لحظة وانتي بخير ياأمي

حبيبتي ياماما

النهاردة عيد ميلادك الغالي

من عند خالتو نجوي وفي صحبة خالتو مديحة

بقوا شبهك قوي ياماما

.......

ماما

يمكن هديتنا ليكي بعد كده هي اكتر حاجه توصلك

ماما

بحبك ,,, وحشتيني ,,,, راضية عني ياحاجة ؟

بنتك الصغيرة

سلمي
التاريخ
19/5/2012

كتيييييييييييير قوي

اللي حصل اكتر من ان تحتويه الكلمات
بس كل اللي اقدر اقوله اني "تعبانه"
اينعم ده مش جديد بس المرة ديه الموضوع مختلف لا مختلف قوي قوي
لسلمي اللي كانت هنا
انا جيتلك يمكن افتكر
لسلمي اللي بتكتب
"معلش"
لسلمي اللي حتكون
ارجوكي اتعلمي بقي
اكييييييييييد حرجع تاني

أمي ,,, ماتت

بدون ادني شك
هي ماتت
بدون ادني استطاعة
مش قادرة استوعب
,,,,
ماما
انا قصرت
ماما
انا غلطت
ماما
ارجوكي ارجعي تاني
ماما
استغفر الله العظيم
ماما
احمد لسه بيدعيلك "ربنا يشفيكي يانانه"
ماما
انا اتأخرت كتير قوي
ماما
ادعيلي
ماما
انا بحب ابيه محمد
ماما
عطاء تعبانة قوي
ماما
انا شيلت كيميا
ماما
انا حامل
ماما
انا بحب محمد قوي
ماما
طنط جيهان ست طيبة قوي
ماما
عمتو عزة بتحبني قوي
ماما
دكتورة امل كباش بتحبك قوي
ماما
انا خايفة قوي
ماما
وحشتيني
ماما
نفسي اخدمك
ماما
ربنا معاكي

اشتقت اليّ

بسم الله الرحمن الرحيم
الي الجزء المضيء بحياتي
الي الجزء المتبقي من نقائي بداخلي
الي سلمي التي افتقدتها
الي ضحكتي وبسمتي واشراقي


و ح ش ت و ن ي


:(
:(
:(

آه آه آه

أنا تعبانة
أنا تعبانة قوي
أنا تعبانة بجد
آه آآه آه قوي
أنا قلبي بيوجعني
أنا زعلانة منك قوي
بس بقي كفاية كده
سلام

salma is friendless..

عمري ماعرفت الناس في وقت فراغي
ولا تواصلت معاهم بس وأنا قاعدة فاضية
بل بالعكس جدا
انا حاسة اني موجوعة لأني معنديش اصحاب بجد
أيوة أنا اجتماعية وحواليا ناس كتير فعلا كويسين
بس أنا محتاجة حد واحد بس ألاقيه جنبي في تعبي فعلا مش أنا اللي أتحايل وأسأل علشان يعبرني
حد واحد بس يحس بيه يفهمني
يستوعبني
ماهو مش ممكن حفضل كده صاحبة كل الناس من بره لكن أنا مين اصحابي
عمري ماحبيت تعبير الجروب والشلة بس فعلا أنا حاسة اني محتجاه دلوقتي
يووه ده فيه كيميا يا جدعان
ألا مين هما الجدعان اللي هما دايما بكتبلهم
ولا أعرف
يله بقي
سلام عليه

بحب الراديو :D

عمري ماحبيته ولا عمري سمعت راديو
بس كان حواليا ناس فيهم تميز في نقط معينة لقيتهم كلهم بيحبوا الراديو
فقررت أنا كمان
أحب الراديو
مش يمكن يكون هو ده السبب
الله أعلم
ملحوظة
ديه تدوينة من نفس ذات الموبايل اللي شغال عليه الراديو
صباحكو ورد